काठमाडौं उपत्यकाको मातातीर्थ सब स्टेसनको उद्घाटन आज

काठमाडौं । काठमाडौं उपत्यकाको सबैभन्दा ठूलो मातातीर्थ सबस्टेसन र मर्स्याङ्दी-काठमाडौं २२० केभी प्रसारण लाइनको आज उद्घाटन हुँदैछ । काठमाडौंको चन्द्रागिरि नगरपालिकास्थित मातातीर्थमा दिउँसो ३ बजे आयोजना गरिएको कार्यक्रममा प्रधानमन्त्री पुष्पकमल दाहालले सबस्टेसन र प्रसारण लाइन उद्घाटन गर्न लागेका हुन् ।

त्रिशूली र मर्स्याङ्दी नदी जलाधार क्षेत्रका जलविद्युत आयोजनाको विद्युत् काठमाडौं उपत्यकामा आपूर्ति गर्न र देशभित्रको एकीकृत विद्युत् प्रणालीलाई सुदृढ बनाउन मातातीर्थ २२० केभी सब स्टेसन निर्माण गरिएको हो । यो परियाजनाले काठमाडौं उपत्यकाको विद्युत माग सम्बोधन हुनुका साथै समग्र विद्युत प्रणालीमा सुधार हुने प्राधिकरणले अपेक्षा राखेको छ ।

प्राधिकरणको लगानी र नर्वे सरकारको अनुदान तथा एसियाली विकास बैंकको सहुलितपूर्ण ऋणमा आयोजना शुरु गरिएको हो । आयोजनाको अनुमानित लागत साढे ६ अर्ब रुपैयाँ रहेको प्राधिकरणले जनाएको छ ।