काठमाडौंको माइतीघरदेखि बानेश्वरसम्म निषेधित क्षेत्र घोषणा

काठमाडौं । जिल्ला प्रशासन कार्यालय, काठमाडौंले माइतीघरदेखि नयाँ बानेश्वरसम्मको सडक क्षेत्रलाई एक महिनाका लागि निषेधित क्षेत्र घोषणा गरेको छ ।

काठमाडौंका प्रमुख जिल्ला अधिकारी जितेन्द्र बस्नेतल आजैदेखि लागु हुनेगरी ३० दिनसम्मका लागि माइतीघरदेखि नयाँ बानेश्वरसम्मको क्षेत्रलाई निषेधित क्षेत्र घोषणा गरेका हुन् ।

यससँगै अब माइतीघरदेखि बानेश्वरसम्मको सडक क्षेत्रमापाँच जनाभन्दा बढी व्यक्ति भेला भई जुलुस, प्रदर्शन, धर्ना घेराउ, अनशन, सभाजस्ता आन्दोलन वा विरोधका कार्यक्रम गर्न पाइने छैन । जिल्ला सुरक्षा समितिको सिफारिससमेतका आधारमा निषेधित क्षेत्र घोषणा गरेको प्रमुख जिल्ला अधिकारीको आदेशमा उल्लेख छ ।

‘एक वा सोभन्दा बढी समूहद्वारा एकै मिति, समय र स्थानमा भेला जम्मा भई अनशन, धर्ना, घेराउ र विरोध प्रदर्शन जस्ता कार्यक्रम आयोजना गर्दा विभिन्न समूहबीच आपसी विवाद, झैझगडा, मुठभेड एवं भिडन्त भई शान्तिसुरक्षा भंग हुनेसक्ने तथा हुलदंगा वा अशान्ति हुनसक्ने भई समग्र रूपमा शान्ति सुरक्षामा प्रत्यक्ष असर पर्ने भएकाले निषेधाज्ञा लागु गरिएको’ आदेशमा उल्लेख छ ।

युवा संघ र दुर्गा प्रसाईंले मंसिर ७ गते बिहीबार माइतीघर मण्डलामा प्रदर्शन गर्न लागेका कारण जिल्ला प्रशासन कार्यालयले निषेधित क्षेत्र घोषणा गरेको हाे ।