गृह मन्त्रालय सुधारका लागि कार्ययोजना तयार पार्न अध्ययन समिति गठन

काठमाडौं । गृह मन्त्रालय सुधारका लागि कार्ययोजना तयार पार्न सरकारले पूर्वमुख्य सचिव लिलामणि पौड्यालको संयोजकत्वमा समिति गठन गरेको छ । सोमबार गृह मन्त्रालयमा अध्ययन समिति गठन गरेको गरेकाे हाे ।

अध्ययन समितिमा पूर्वसचिव शरदचन्द्र पौड्याल, शंकरप्रसाद कोइराला, लक्ष्मीप्रसाद ढकाल, प्रा.डा.खड्ग केसी, पूर्व प्रहरी महानिरीक्षक प्रकाश अर्याल, पूर्वसशस्त्र प्रहरी महानिरीक्षक सिंहबहादुर श्रेष्ठ, समाजशास्त्र डा. बिन्दु पोखरेल, सूचना प्रविधि विज्ञ विजय गौतम रहेका छन् ।

आज गृह मन्त्रालयमा आयोजित पत्रकार सम्मेलनमा उपप्रधानमन्त्री तथा गृहमन्त्री नारायणकाजी श्रेष्ठले समितिका संयोजक तथा सदस्यहरु सबैले स्वयंसेवकको रुपमा काम गरी तीन महिनाभित्र प्रतिवेदन बुझाउन समय दिइएको बताए ।

मन्त्री श्रेष्ठका अनुसार अध्ययन समितिले नेपाल प्रहरी, सशस्त्र प्रहरी, कारागार व्यवस्थापन, अध्यागमन व्यवस्थापन, विपद न्यूनीकरण तथा व्यवस्थापन र राष्ट्रिय परिचयपत्रको क्षेत्रमा सुझाव दिने छ ।

उनले भने, ‘जसमा नेपाल प्रहरी, सशस्त्र प्रहरी बल नेपाल, कारागार व्यवस्थापन, अध्यागमन व्यवस्थापन, स्थानीय प्रशासन र सेवा प्रवाह र राष्ट्रिय परिचयपत्रको कामलाई कसरी अझै प्रभावकारी बनाउने, यसको औचित्य पुष्टि गर्ने कामलाई कसरी अघि बढाउने भन्ने सन्दर्भका कामहरू पनि छन् । गृह मन्त्रालयका सम्पूर्ण कामहरुलाई अझ प्रभावकारी र परिणाममुखी बनाउन प्रतिबद्ध छौं ।’