पाँच सयभन्दा बढी रोहिङ्ग्या शरणार्थी इण्डोनेसिया पुगे

काठमाडाैं । पाँच सयभन्दा बढी रोहिङ्ग्या शरणार्थी तीन वटा डुंगा चढेर इण्डोनेसिया पुगेका छन् । शरणार्थी बोकेका तीन वटा डुंगा आइतबार इण्डोनेसियाको सबैभन्दा पश्चिमी प्रान्त पुगेको संयुक्त राष्ट्रसंघीय एजेन्सी यूएनएचसीआरले जनाएको छ ।

सन् २०१७ मा म्यान्मारद्वारा अल्पसंख्यक रोहिङ्ग्या समूहमाथि सैन्य कारबाही सुरु गरेपछिको यो सबैभन्दा ठूलो आगमन मध्येको एक हो । अधिकांश मुस्लिम रोहिङ्ग्याले म्यान्मारमा व्यापक उत्पीडनको सामना गर्नुपरेको छ । उनीहरू प्रत्येक वर्ष आफ्नो ज्यानलाई जोखिममा राखेर प्राय: कमजोर डुंगा मा मलेसिया वा इण्डोनेसियासम्म पुग्ने प्रयासमा लामो र महङ्गो समुद्री यात्रा गर्छन् ।

राष्ट्रसंघीय शरणार्थी एजेन्सीका सहयोगी फैसल रहमानले एउटा डुंगा आचे प्रान्तको बिरेयुन जिल्लामा दुई सय ५६ रोहिङ्ग्या लिएर आइपुगेको र अर्को कम्तीमा दुई सय ३९ बोकेर आचेको पिडी क्षेत्रमा आइपुगेको जानकारी दिएका छन् ।