एमालेको बाग्मती प्रदेश अध्यक्षमा दाहाल र ढुंगेल उम्मेदवार

काठमाडाैं । नेकपा एमालेको बागमती प्रदेश अध्यक्षमा कृष्ण दाहाल र कैलाश ढुंगेलबीच मात्र चुनावी प्रतिस्पर्धा हुने भएको छ । एक दिन मतदान रोकेर गरेको छलफलपछि अध्यक्षका तीन उम्मेदवार पछि हटेका हुन् ।

वर्तमान अध्यक्ष केशव पाण्डेले बिहीबार बिहानै उम्मेदवारी फिर्ता लिएका थिए । उनले अध्यक्षका अर्का उम्मेदवार ढुंगेललाई समर्थन गर्नुभएको छ । साँझ सानुकुमार श्रेष्ठ र केशरबहादुर बुढाथोकीले पनि उम्मेदवारी फिर्ता लिएका छन् ।

दुवैले अध्यक्षका अर्का उम्मेदवार दाहाललाई समर्थन गरेको नेताहरूले बताएका छन् । नेताहरुले अझै पनि सहमतिको प्रयास हुने बताएपछि दाहाल र ढुंगेलबीच चुनाव हुने निश्चित भएको छ ।

अध्यक्षमा सहमतिको प्रयास जारी रहेको भन्दै साँझ ६ बजेबाट हुने भनिएको मतदान भोलिलाई सारिएको हो । भोलि बिहान ८ बजेदेखि दिउँसो २ बजेसम्म मतदानको समय तोकिएको नेता शेरबहादुर तामाङले जानकारी दिए ।

बागमती प्रदेश उपमहासचिव महेश बर्तौलाका अनुसार अध्यक्षसहितको पदाधिकारीमा सर्वसम्मत नेतृत्व चयन गर्न केन्द्रीय नेताहरू लागेका छन् भने सदस्यहरू सर्वसम्मत गर्न जिल्ला कमिटीलाई जिम्मा दिइएको छ ।