सुदूरपश्चिममा ऐन विपरीत प्रयोग गरेका गाडी फिर्ता गर्न नेताहरुलाई निर्देशन

काठमाडौं । सुदूरपश्चिम प्रदेश सरकारले ऐन विपरीत नेताहरूले प्रयोग गरिरहेका गाडी फिर्ता गर्न निर्देशन दिएको छ । बिहीबार बसेको प्रदेश सभाको सार्वजनिक लेखा समितिले सत्ता पक्षका नेताहरूले सेवा सुविधा सम्बन्धी ऐन विपरीत प्रयोग गरिरहेका गाडी तीन दिनभित्र प्रदेशसभा सचिवालयलाई फिर्ता गर्न निर्देशन दिएको हो ।

प्रदेशसभाका पदाधिकारी तथा सदस्यको सेवा सुविधा सम्बन्धी ऐनमा भएको व्यवस्था विपरीत गाडी सुविधा लिएको भेटिएपछि फिर्ता गर्न निर्देशन दिइएको लेखा समितिका ज्येष्ठ सदस्य बिक्रम धामीले जनाकारी दिए । सत्तारूढ नेकपा माओवादी केन्द्रका संसदीय दलका नेता खगराज भट्ट, नागरिक उन्मुक्ति पार्टीका दलका नेता घनश्याम चौधरी र नेकपा एकीकृत समाजवादी पार्टी संसदीय दलका नेता दीर्घ सोडारीलगायतले सुविधाको गाडी प्रयोग गर्दै आएका छन् ।

लेखा समितिले यसअघि संसद सचिवालयलाई ऐन विपरीत दिइएका गाडी फिर्ता गराउन प्रदेशसभा सचिवालयलाई भनेको थियो । सचिवालयले मौखिक रुपमा गाडी बुझाउन भनेको थियो तर गाडी फिर्ता भएको थिएन ।