कागखोलामा फेरि बाढी आउँदा स्थानीय त्रसित 

काठमाडौं । मुस्ताङको कागखोलामा फेरि बाढी आएको छ । एक सातापछि माथिल्लो तटीय क्षेत्रमा पुनः बाढी आउँदा स्थानीय त्रसित बनेका छन् ।

आइतबार राति पानी पर्दा कागखोलामा मिसिने माथिका दुई (झोङ र मुक्तिनाथ) खोलामा पनि बाढी आएको हो । बाढीले उपल्लो मुस्ताङ जोड्ने सडकमा क्षति पुर्‍याएको प्रमुख जिल्ला अधिकारी अनुप केसीले जानकारी दिए । बारागुङ गाउँपालिका-२ का वडाध्यक्ष न्होरू गुरूङले मुक्ति क्षेत्र र झोङमा मध्यम वर्षा भएको बताए । मुस्ताङको तल्लो तटीय क्षेत्रमा सामान्य वर्षा भएको मौसम पूर्वानुमान महाशाखाको तथ्याङकअनुसार जोमसोम स्टेसनमा पछिल्लो २४ घन्टामा ६.६ मिलिमिटर वर्षा मापन भएको हो ।

साउन २८ गते कागखोलाको बाढीले कागबेनी क्षतिग्रस्त तुल्याएको थियो । कागखोलाको बाढीले २९ वटा घर, प्रभु बैंकको मुस्ताङ शाखा, सामूदायिक विद्यालय, श्राद्धस्थल, धर्मशाला बगाएको थियो। १३ वटा घरमा आंशिक क्षति पुर्‍याएको थियो ।