भुटानी शरणार्थी प्रकरणमा कसैले कसैलाई बचाऊ गर्न सक्ने अवस्था छैन : सञ्चारमन्त्री शर्मा

काठमाडौं । सञ्चार तथा सूचना प्रविधिमन्त्री रेखा शर्माले नक्कली भुटानी शरणार्थी प्रकरणमा कसैले कसैलाई पनि बचाऊ गर्न सक्ने अवस्था नरहेको बताएकी छन् ।

नेपाल सरकारका प्रवक्ता समेत रहेकी शर्माले सरकारले आफैंभित्र त्यो देखिए पनि त्यसलाई कारबाही गरेर अघि बढने संकल्प लिएको स्पष्ट पारिन् ।

प्रेस सेन्टर नेपाल, प्रतिष्ठान प्रदेश समितिले शनिबार काठमाडौंमा आयोजना गरेको एक कार्यक्रममा बोल्दै उनले सरकारले राम्रो कामको सुरुवात गरिरहेको दावी समेत गरिन् । मन्त्री शर्माले माओवादी मन्त्रीहरुले विगत र अहिले पनि अरु दलका मन्त्रीहरुले भन्दा राम्रो काम गरिरहेको जिकिर गरिन् ।

माओवादी पार्टीका मन्त्री बनेकाहरुले पनि बदमासी गरेको हुन सक्ने स्वीकार गर्दै शर्माले अरु दलका मन्त्रीहरुको तुलनामा भने कम गल्ती गरेको बताइन् ।

उनले प्रधानमन्त्री पुष्पकमल दाहालले आफ्नो तेस्रो कार्यकाल बढी सुझबुझपूर्ण ढंगले अघि बढाएको भन्दै प्रशंशा समेत गरिन् । मन्त्री शर्माले सरकारले राम्रो काम गरिरहेको उल्लेख गर्दै त्यसको प्रचारप्रसारको काम गरिदिन पनि सञ्चार माध्यामहरुलाई आग्रह गरिन् ।