नेपाल बैंकले खोल्यो सुर्खेतको वीरेन्द्रनगरमा नयाँ शाखा

काठमाडौं । नेपाल बैंक लिमिटेडले सुर्खेतको वीरेन्द्रनगर नगरपालिका-४, यरिचोकमा शाखा विस्तार गरेको छ ।

कर्णाली प्रदेशका मुख्यमन्त्री राजकुमार शर्मा तथा बैंकका नायब प्रमुख कार्यकारी अधिकृत समता पन्तले मंगलबार संयुक्तरूपमा शाखा उद्घाटन गरेका हुन् ।

कार्यक्रमा मुख्यमन्त्री शर्माले शहरमा मात्र केन्द्रित नभई स्थानीय तहमा गएर शाखा खोल्न सुझाव दिए । उनले शाखाले नाफामुखी मात्र नभएर सहज, सुलभ, विश्वनीय र गुणस्तरिय सेवा प्रवाह गर्ने विश्वास व्यक्त गरे । आर्थिक मामिला तथा योजना मन्त्री वेदराज सिंहले बैंकहरुलाई दुर्गम लक्षित सेवा बढाउन आग्रह गरे ।

कार्यक्रममा सामाजिक विकास मन्त्री खड्कबहादुर पोखरेल, भूमि व्यवस्था, कृषि तथा सहकारी मन्त्री भीमप्रकाश शर्मा, भौतिक पूर्वाधार तथा शहरी विकासमन्त्री मंगल शाही, जलस्रोत तथा उर्जा विकासमन्त्री उर्मिला विश्वकर्मालगायत सहभागी थिए ।

कार्यक्रममा पहिलो निक्षेपकर्ता मोतीसिंह भण्डारी र पहिलो बिजनेस पार्टनर न्यू बराल किराना पसललाई सम्मान गरिएको थियो । कार्यक्रममा बैंकका नायब प्रमुख कार्यकारी अधिकृत पन्तले मायाको चिनो प्रदान गरिन्।

कार्यक्रम नेपाल बैंक सुर्खेत शाखाका शाखा प्रबन्धक बालराज बुढाको अध्यक्षतामा सम्पन्न भएको थियो।