ओली, प्रचण्ड र देउवाको भेटमा रास्वपाको आशंका

काठमाडौं । पछिल्लो समय प्रधानमन्त्री प्रचण्ड, कांग्रेस सभापति शेरबहादुर देउवा र एमाले अध्यक्ष ओलीबीच बाक्लिएको भेटलाई राष्ट्रिय स्वतन्त्र पार्टीले आशंकाको रुपमा हेरेको छ । सार्वजनिक रुपमा नै आपसमा तिक्तता साधेर नथाक्ने, प्रचण्ड ओलीको गठबन्धन सरकार ढलेयता बाक्लिएको यो भेटलाई रास्वपाले नक्कली भुटानी सरणार्थी प्रकरण सामसुम पर्ने रुपमा अथ्र्याउँदै आशंकाको दृष्टिकोणले हरेको हो ।

तीन दलका शीर्ष नेताहरु बसेर नक्कली भूटानी शरणार्थी प्रकरण मिलाउने प्रयास भइरहेको रास्वपाको ठहर छ । उक्त दलले तीन दलका शीर्ष नेताहरुको बैठक बसेर नक्कली शरणार्थी प्रकरण मिलेमतोमा सल्ट्याउने प्रयास गर्न नहुने भन्दै त्यसका लागि दवाव सिर्जना गर्नेसमेत बताएको छ । प्रमुख सचेतकसमेत रहेका सन्तोष परियारले संसदीय दलको बैठकमा भ्रष्टाचारको घटना मिलाउनका लागि तीन दलको बैठक बस्नु नहुने बताए । साथै आफ्नो पार्टी राजनीतिक लेनदेनमा नबस्ने भन्दै संसद प्रभावकारी बनाउनुपर्ने उनको भनाई थियो ।

भ्रष्टाचारमा अहिले भइरहेको छानबिनको विषयलाई पार्टीले समर्थन गर्ने तर यतिमा मात्रै खुशी हुने अवस्था नरहेको उनको भनाइ छ । उनले सबै चनाखो भएर रहनुपर्ने अवस्था आएको भन्दै नक्कली भूटानी शरणार्थी प्रकरणलाई तलमाथि हुन नदिन आफ्नो पार्टी लागिपरेको समेत उल्लेख गरे । पछिल्लो समय शीर्ष तीन दलका नेताहरुको बैठक बसिरहेको र त्यसले संसदलाई बन्दी बनाउने अशंका उब्जाएको परियारको भनाई थियो । बैठक बस्न मिल्ने तर संसदीय गतिविधिहरु संसदबाट नै हुनुपर्ने अडान रास्वपाको रहेको भन्दै उनले संसदबाट हुनुपर्ने काम कारबाही र निर्णय संसदबाट नै हुनुपर्ने धारणा राखे ।

प्रमुख सचेतक परियारले लोकतन्त्रलाई बलियो बनाउने र प्रभावकारी बनाउने हो भने सबै राजनीतिक पार्टीहरुलाई हैसियत अनुसारको समितिको नेतृत्व दिनुपर्ने स्पष्ट समेत पारे । यसअघि शनिबार आयोजित दवाव कार्यक्रममा बोल्दै सभापति रवि लामिछानेले समेत सरकाले यो घटना सामसुम पार्न खोजेको आशंका गरेका थिए ।