म्याद थप गर्न टोपबहादुर रायमाझीलाई आज अदालत उपस्थित गराइने

काठमाडौं । नक्कली भुटानी शरणार्थी प्रकरणमा पक्राउ परेका पूर्व उपप्रधानमन्त्री तथा नेकपा एमाले नेता टोपबहादुर रायमाझीलाई अनुसन्धानका लागि म्याद थप गर्न आज अदालत लगिँदै छ।

पक्राउ पुर्जी जारी भएपछि १० दिनदेखि फरार रायमाझीलाई प्रहरीले आइतबार राति बूढानीलकण्ठबाट पक्राउ गरेको हो। आइतबार राति काठमाडौं प्रहरी परिसर ल्याइएका एमालेका निलम्बित सचिव रायमाझीलाई आज काठमाडौं जिल्ला अदालतमा उपस्थित गराई प्रहरीले अनुसन्धानका लागि म्याद लिने भएको हो।

रायमाझी पक्राउ परेसँगै नेपालीलाई नक्कली भुटानी शरणार्थी बनाई अमेरिका लाने भन्दै करोडौँ रकम ठगी गरेको अभियोगमा समातिनेको संख्या १३ पुगेको छ।

नक्कली भुटानी शरणार्थी बनाएर ठगेको प्रकरणमा रायमाझीका छोरा सन्दीप रायमाझीलाई यसअघि नै बुटवलबाट पक्राउ गरिसकेको छ भने यही प्रकरणमा पूर्वगृहमन्त्री बालकृष्ण खाणसमेत पक्राउ परिसकेका छन्। काठमाडौं जिल्ला अदालतले नक्कली भुटानी शरणार्थी प्रकरणमा पक्राउ परेका १२ जनालाई आइतबार नै थप चार दिन हिरासतमा राख्न अनुमति दिएको छ।