नक्कली शरणार्थी प्रकरणमा शेखर कोइराला भन्छन्- जो दोषी देखिए पनि कारबाही हुनुपर्छ

काठमाडौं । नेपाली कांग्रेसका नेता डा. शेखर कोइरालाले नक्कली शरणार्थी प्रकरण देशका लागि लज्जास्पद भएको बताएका छन् । बुधबार बिहान विराटनगर विमानस्थलमा पत्रकारहरुसँग कुरा गर्ने क्रममा डा. कोइरालाले देशका लागि लज्जास्पद भएको बताउदै जो दोषी देखिए पनि उनीहरुलाई कारबाही हुनुपर्ने बताएका हुन् ।

उनले भने, ‘जोजो दोषी हो, उनीहरुलाई कारबाही हुनपर्छ यसमा इफ र बटको कुरै छैन,’ डा। कोइरालाले भने, ‘उनीहरुले पनिसमेन्ट पाउनुपर्छ । यसमा राजनीतिक दबाब हुनु हुँदैन । यसमा प्रहरीले गरिरहेको अनुसन्धान अब रोकिन्छ भन्ने मलाई चाहिँ लाग्दैन । प्रहरीले यो अनुसन्धान एउटा लेभलसम्म पुर्याउँछ, पुर्‍याउँछ ।’

यसमा राजनीतिक दबाव दिन नहुने नेता डा. कोइरालाको भनाइ छ । यस प्रकरणले अन्तर्राष्ट्रिय रुप लिइसकेको बताउँदै उनले प्रहरीले गरिरहेको अनुसन्धान बीचमै नरोकिने विश्वास व्यक्त गरे ।