अमेरिकाको टेक्सासमा कार दुर्घटना : ७ जनाको मृत्यु, ६ घाइते

काठमाडौं । अमेरिकाको टेक्सासमा कार दुर्घटना हुँदा ७ जनाको मृत्यु भएको छ भने ६ जना घाइते भएका छन् ।

अमेरिकाको टेक्सास राज्यमा घरबारविहीन र आप्रवासीहरूका लागि आश्रयस्थल नजिक रहेको बस स्टपमा एउटा कारले एक समूहलाई ठक्कर दिँदा सात जनाको मृत्यु भएको हो । दुर्घटनामा केहीको अवस्था गम्भीर रहेको ब्राउन्सभिल प्रहरीले जनाएको छ।

घटना मेक्सिकोको सीमा नजिकैको ब्राउन्सभिल सहरमा स्थानीय समय अनुसार बिहान ८ः३० बजे भएको थियो। चालकलाई नियन्त्रणमा लिएर मुद्दा चलाइएको छ । घटना नियोजित हो कि होइन भन्ने स्पष्ट नभएको ब्राउन्सभिल प्रहरीले बताएको छ । यसअघि अमेरिकी सञ्चारमाध्यमले प्रहरीलाई उद्धृत गर्दै यो नियोजित हमला भएको बताएको थियो।

घटनापछि चालकलाई उपचारका लागि अस्पताल लगिएको र लागुऔषध र मदिरा परीक्षण गरिएको प्रहरीले जनाएको छ । उनले अधिकारीसँग असहयोग गरेको बताइएको छ। अमेरिकी सीमा सुरक्षा अधिकारीहरूका अनुसार ब्राउन्सभिल सहरमा हालै अवैध आप्रवासीहरूको आगमनमा तीव्र वृद्धि भएको छ।