अमेरिकाको सिलिकन र सिग्नेचरपछि डुब्यो फर्स्ट रिपब्लिक बैंक

काठमाडौं । अमेरिकाको १४औं ठूलो फर्स्ट रिपब्लिक बैंक डुबेको छ । क्रिप्टोमा अत्याधिक लगानीका कारण संकटग्रस्त बनेको बैंक अमेरिकाको नियमनकारी निकाय फेडेरल डिपोजिट इन्स्योरेन्स कर्पोरेसनको मध्यस्थतामा जेपी मोर्गनले स्वामित्व ग्रहण गरेको हो ।

जेपी मोर्गन फर्स्टले रिपब्लिक बैंकको १ खर्ब ७३ अर्ब अमेरिकी डलरको कर्जा लगानी, ३० अर्ब बचतपत्र र ९२ अर्ब अमेरिकी डलरको बचतको टेकओभर गरेको छ । यसअघि अमेरिकामै मार्च महिनामा मात्रै सिलिकन भ्याली र सिग्नेचर बैंक टाँट पल्टिएको थियो । यता फर्स्ट रिपब्लिक टाँट पल्टिएपछि अमेरिकाको फेरेडल रिजर्भले अमेरिकाको बैंकिङ प्रणाली निकै मजबुत र उत्थानशील रहेको पुनः दावी गरेको छ ।

बचतकर्ताहरूले रकम झिक्न थालेपछि रिजर्भले वित्तीय बजारलाई स्थायित्व दिन आपत्कालीन कदम चालेको छ । मार्चमा सिलिकन भ्याली र सिग्नेचर बैंकको पतनले अमेरिकाको मात्र नभई विश्वकै बैंकिङ उद्योगमा ठूलो डर पैदा गरेको थियो । फेरि अर्को बैंकको पतनले विश्वको बैंकिङ उद्योगलाइ नै झड्का दिएको छ ।