सरकारमा सहभागिताबारे रास्वपाले शुक्रबार निर्णय गर्ने

काठमाडौं । राष्ट्रिय स्वतन्त्र पार्टी रास्वपाले सरकारमा सहभागिताबारे शुक्रबार मात्र निर्णय गर्ने भएको छ । प्रवक्ता डा.मुकुल ढकालका अनुसार सरकारमा जाने कि नजाने भन्ने विषयमा शुक्रबारको बैठकले निर्णय गर्ने भएको हो ।

सोमबार बसेको केन्द्रीय समितिको बैठकपछि बोल्दै प्रवक्ता ढकालले सरकारमा जाने कि प्रतिपक्षमा बस्ने भन्नेबारे शुक्रबारको बैठकले निर्णय गर्ने बताए । प्रधानमन्त्री पुष्पकमल दाहाल प्रचण्ड साविकको मन्त्रालय दिन र न्यूनतम साझा कार्यक्रम पुनर्लेखनका लागि पनि तयार रहेको ढकालले बताए ।

केन्द्रीय सदस्यहरुले सरकारमा जाने नजानेबारे आ आफ्नो धारणा राखेका थिए । एक केन्द्रीय सदस्यका अनुसार अधिकांशले सरकारमा गएर काम गर्न सक्ने वातावरण नभएसम्म जान नहुने बताएका एक नेताले बताए । तर पार्टीको एजेण्डा सरकारको नीति तथा कार्यक्रममा समावेश हुन्छ भने जान पनि सकिने उनीहरुको जोड थियो । उपचुनावपछि सोमबार पहिलो पटक बसेको बैठकमा पछिल्लो राजनीतिक परिस्थिति र सरकारमा सहभागिताबारे छलफल भएको थियो ।