‘सरकारमा जाने होइन, सरकारलाई दिएको समर्थनबारे आज निर्णय गर्छौ’

काठमाडौं । राष्ट्रिय स्वतन्त्र पार्टीका सभापति रवि लामिछानेले सरकारमा सहभागी हुने  विषय आफूहरूले सोच्न पनि नसक्ने बताएका छन् । प्रतिनिधिसभाको सदस्यको शपथ लिएपछि सञ्चारकर्मीसँग कुरा गर्दै सभापति लामिछानेले उपनिर्वाचनपछि सरकारमा जाने वातावरण नै नभएको बताएका हुन् । 

उनले भने, ‘हामी निर्वाचनमा गइरहँदा जस्तो किसिमको गतिविधि हामीले हेर्यौं त्यसले सरकारमा जाने विषयमा हामीले सोच्ने कुरा छैन । त्यस्तो वातावरण पछि छैन । सरकारको समर्थन फिर्ता लिने सम्भावना बढी छ ।’   सभापति रवि लामिछानेले प्रचण्ड नेतृत्वको गठबन्धन सरकारलाई दिएको समर्थन फिर्ताबारे आज निर्णय लिन सक्ने बताएका छन् । उनले सरकारलाई दिएको समर्थनका विषयमा सम्भवतः केन्द्रीय समितिको बैठक बसेर निर्णय लिने बताएका हुन् । 

प्रधानमन्त्री पुष्पकमल दाहाल ‘प्रचण्ड’ ले आफूलाई बधाई दिन फोन गरेको बताए । कुराकानीको क्रममा सरकारलाई दिएको समर्थन फिर्ताबारे चासो राखेको भए पनि गम्भीर छलफल नभएको रविले बताए ।