कतारविरुद्ध १५७ रनमै समेटियो नेपाल, सन्दीपले बनाए सर्वाधिक रन

काठमाडौं । एसीसी मेन्स प्रिमियर कपमा घरेलु टोली नेपालले कतारलाई १ सय ५८ रनको मध्यम लक्ष्य दिएको छ । कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको नेपालले ४० ओभर ३ बलमा सबै विकेट गुमाउँदै १५७ रनमै अलआउट भएको हो ।

पछिल्लो समय उच्च लयमा रहेको नेपाली ब्याटिङ कतार सामू अपत्यारिलो रुपमा धराशयी बन्यो । कतारी बलरसामू धरासायी बनेको नेपालको ब्याटिङ लाइन पुछारका ब्याटरद्वय सन्दीप लामिछाने र ललित राजवंशीले सम्हाल्दै टिमको उद्धार गरे । नेपालका कुनै पनि ब्याट्सयानले ४० भन्दा माथिको स्कोर बनाउन सकेनन् । १० औं नम्बरमा आएका सन्दीप लामिछाने सबैभन्दा धेरै रन बनाए । सन्दीपले ५८ बलको सामना गर्दै सर्वाधिक ४२ रन बनाए भने सन्दीपलाई साथ दिएका ललितले १ रन जोडे । उनले १७ बलको सामना गरे ।

नेपालले अघिल्ला खेलको तुलनामा राम्रो सुरुवात गर्न सकेन । चार ओभरमै सुरुवाती दुई विकेट गुमायो । नेपालले २४ ओभर खेल्दा ६ विकेट गुमाएर ९२ रन मात्रै बनाउन सकेको थियो ।