‘लोकतान्त्रिक र निर्णायक राजनीतिक शक्तिको रुपमा कांग्रेसलाई स्थापित गर्नेछौं’ : महामन्त्री थापा

काठमाडौं । नेपाली कांग्रेसका महामन्त्री गगन थापाले उपचुनावमा निर्वाचित तीनै जनालाई बधाई तथा शुभकामना दिएका छन् ।

थापाले बुधबार सामाजिक सञ्जालमार्फत चितवन २ बाट निर्वाचित राष्ट्रिय स्वतन्त्र पार्टी (रास्वपा) का रवि लामिछाने, तनहुँ एकबाट निर्वाचित रास्वपाका स्वर्णिम वाग्ले र बारा २ बाट निर्वाचित जसपाका उपेन्द्र यादवलाई बधाई दिएका हुन् ।

थापाले उपनिर्वाचनको सन्देशलाई लिएर भएका सार्वजनिक बहस र विश्लेषणले कांग्रेस रुपान्तरणको अभियानलाई थप मद्दत पुग्ने आशा व्यक्त गरेका छन् ।

सामाजिक सञ्जालमार्फत महामन्त्री थापाले भनेका छन्, ‘पार्टीलाई रुपान्तरण गरी जनचाहना अनुसार अझै लोकतान्त्रिक,प्रगतिशील, समावेशी र निर्णायक राजनीतिक शक्तिको रुपमा नेपाली कांग्रेसलाई स्थापित गर्नेछौं । र, जननायक बीपी कोइरालाको परिकल्पना अनुरुपको ‘समुन्नत नेपाल सम्मानित नेपाली’ को हाम्रो संकल्प पूरा गर्नेछौं ।’

‘आम अपेक्षा अनुरुप परिणाममुखी भूमिका निर्वाह गर्न कहीँ कतै म स्वयं पनि खरो उत्रन सकिन कि भनेर आत्मसमीक्षा र आत्मनिरीक्षण गरिरहेको छु’, उनले भनेका छन्, ‘पार्टीका साथीहरु, समर्थक, शुभेच्छुक तथा वौद्धिक समुदायसँग परामर्श र आम नागरिक तहमा संवाद गरी छिट्टै नै एउटा दृढ संकल्पका साथ नेपाली कांग्रेस रूपान्तरणको ठोस नीति, योजना र कार्यक्रम सहितको स्पष्ट मार्गचित्र लिएर आउनेछौं ।’