‘ओलीविरुद्ध नाराबाजी गर्ने पहिचानवादी हुन्, अराजक गतिविधि गर्ने छुट कसैलाई छैन’ : गृहमन्त्री श्रेष्ठ

काठमाडौं । उपप्रधान तथा गृहमन्त्री नारायणकाजी श्रेष्ठले एमाले अध्यक्ष केपी शर्मा ओलीविरुद्ध कोसी प्रदेशको नामको विरोध गर्नेहरुले ढुंगामुढा र कालो झण्डा देखाएको बताएका छन् । प्रतिनिधिसभाको बैठकमा एमालेका प्रमुख सचेतक पदम गिरीले सत्तापक्षकै कार्यकर्ताले नाराबाजी गरेको आरोप लगाएपछि त्यसको जवाफ दिँदै गृहमन्त्री श्रेष्ठले पहिचानवादीले प्रदर्शन गरेको बताएका हुन् ।

विरोधमा उत्रिएकामध्ये एक जना नियन्त्रणमा लिएको र दुई जना घाइते भएको भन्दै गृहमन्त्री श्रेष्ठले प्रहरीले सकारात्मक भूमिकाको साथ काम गरेको बताए । अराजक गतिविधि गर्न कसैलाई छुट दिन नसक्ने बताउँदै उनले संविधानअनुसार लोकतान्त्रिक विधिबाट आफ्नो कुरा राख्न सबैलाई छुट भएको स्पष्ट पारे । उपप्रधानमन्त्री श्रेष्ठले मिटरब्याज पीडितमाथि काठमाडौंको शान्तिवाटिकामा प्रहरीले बल प्रयोग गर्नु गल्ती भएको स्वीकार समेत गरेका छन् ।

जुनसुकै कारणले मिटरब्याज पीडितमाथि बल प्रयोग गरे पनि त्यो गल्ती भएको भन्दै माफी मागेका छन् । ४ वैशाखमा सिंहदरबार घेराउ कार्यक्रममा जान लागेका मिटरब्याज पीडितलाई शान्तिवाटिकामा प्रहरीले लाठी र पानीको फोहोरा हानेको थियो । आफूले त्यसै दिन विहान बल प्रयोग नगर्न निर्देशन दिएको तर सुरक्षाकर्मीको फिल्ड कमाण्डरसम्म ठीक ढंगले समन्वय नहुँदा बल प्रयोग गरेर गल्ती भएको बताए ।