प्रेम सुवालको प्रश्न – कम्पनीसँग पर्याप्त मल भए किन किसानको हातमा नपुर्‍याएको ?

काठमाडौं । नेपाल मजदुर किसान पार्टीका सांसद प्रेम सुवालले कृषि सामग्री कम्पनीसँग मल पर्याप्त रहेको जानकारी दिने तर किसानको हातमा किन नपुर्‍याएको भन्दै प्रश्न गरेका छन् ।

मंगलबार बसेको प्रतिनिधि सभा बैठकको विशेष समयमा सम्बोधन गर्दै सांसद सुवालले युरिया मल ३७ हजार मेट्रिक टन, डिएपी १९ हजार मेट्रिकटन, साल्ट टेडिङसँग युरिया र डिएपी २१ हजार मेट्रिकटन भएको सार्वजनिक भएपनि देशभरका किसान मल नपाएर चिन्तामा रहेको बताएका हुन् ।

रासायनिक मल खरिदका लागि सरकारले १६ अर्ब ५० करोड पशुपक्षी तथा कृषि मन्त्रालयलाई अझै निकासा नदिएको उनको भनाई थियो । सरकारले किसानलाई समयमा मल नदिने तर भारतबाट विषादी मिसिएको चामल दाल आयात गर्ने गरेको आरोप समेत सांसद सुवाल लगाएका छन् ।

समयमै किसानको हातमा मल नपुर्‍याई कम्पनी र कर्पोरेशनको गोदाममा मल कुहाउने यो सरकार किसान विरोधी किन हैन भन्दै प्रश्न गरे । विषादी भएको दाल चामल खाद्यान्न भारतबाट ल्याएर खुवाउन यो गठबन्धन सरकार बनाइएको हो भनि सभामुख देवराज घिमिरेको ध्यानाकर्षण समेत गराएका छन् ।