‘बारा– २ का विभिन्न मतदान केन्द्रमा जसपाले बुथ क्याप्चर गर्यो’ : सिके राउत

काठमाडौं । जनमत पार्टीका अध्यक्ष डा. सिके राउतले बारा–२ मा जनता समाजवादी पार्टीले बुथ कब्जा गरेको आरोप लगाएका छन् । आइतबार मतदान चलिरहेका बेला सञ्चारकर्मीहरूलाई प्रतिक्रिया दिँदै अध्यक्ष राउतले बारा–२ का तीन चार ठाउँमा जसपाले बुथ कब्जा गरेको र मानिसहरूलाई डर त्रास देखाउने काम गरेको आरोप लगाएका हुन् ।

जसपाका कार्यकर्ताहरूले आफ्ना कार्यकर्तालाई हिँड्न नदिने नीति लिएका उनले बताएका छन् । उनले भने, ‘बेलडारी, झिटकैयासहित अरु १ २ वटा बुथहरु अहिले पनि कब्जा भएको स्थिति छ । हामीले प्रशासनलाई आग्रह गरेका छौं ।’ अध्यक्ष राउतले देवतालको दुई नम्बर कमहरियामा मेयरका भाईले बुथ कब्जा गरेको समेत आरोप लगाएका छन्। उनले कतिपय बुथमा आफ्ना प्रतिनिधिलाई छिर्न नदिएको समेत गुनासो गरेका छन् ।

अध्यक्ष राउतले प्रशासनलई जानकारी गराउँदा पनि प्रहरीबाट सहयोग नपाएको बताए । बारा क्षेत्र नम्बर २ मा उपनिर्वाचन भएका केही मतदान केन्द्रमा आफू पुगेको बताउँदै उनले आफ्नो पार्टीले जित्ने दावी समेत गरेका छन् ।