‘बाहिर हल्ला गरेजस्तो नेपालको अर्थतन्त्र गम्भीर संकटमा छैन’ : गृहमन्त्री श्रेष्ठ

काठमाडौं । उपप्रधान एवं गृहमन्त्री नारायणकाजी श्रेष्ठले अर्थतन्त्रलाई चलायमान गराएर अघि बढ्न सरकार प्रयासरत रहेको बताएका छन् । शनिबार अनामनगरमा प्रेस सेन्टर नेपाल उपत्यका प्रदेश समितिको साधारण सभालाई सम्बोधन गर्दै उनले बाहिर हल्ला गरेजस्तो नेपालको अर्थतन्त्र गम्भीर संकटमा नभएको दावी गरेका हुन् ।

उनले भने, ‘बाहिर हल्ला गरेजस्तो नेपालको अर्थतन्त्र गम्भीर संकटमा छैन तर, समस्या देखिएको छ । यो सुधार हुन्छ, केही कार्यक्रम अघि बढेका छन् ।’ अर्को एक प्रसंगमा उनले शान्ति प्रक्रियाका बाँकी काम तत्काल सक्नुपर्ने बताएका छन् । उनले शान्ति प्रक्रिया सम्पन्न नगरे थप समस्या बढ्ने बताए ।

शान्ति प्रक्रियाका बाँकी काम अहिले हामीले हरहालतमा पूरा गर्नुपर्छ’, उनले भने, ‘यसलाई पूरा हुन नदिन निकै कोसिस भइरहेका छन् । मुलुक शान्ति प्रक्रियामा आएपछि अन्य सबै काम भए पनि शान्ति प्रक्रियाकै काम सम्पन्न नहुँदा समस्या बल्झिने उनले बताए ।