कामु प्रधानन्यायाधीश भने- बार र बेञ्च मिलेर न्यायपालिकाको सुधार गर्नुपर्छ

काठमाडौं । कायममुकायम प्रधानन्यायाधीश हरिकृष्ण कार्कीले बार र बेञ्च मिलेर न्यायपालिकाको शुद्धीकरण र सुधार गर्नुपर्ने बताएका छन् । आज शुक्रबार नेपाल बार एशोसिएसन दोलखा इकाइको भवन उद्घाटन कार्यक्रममा उनले बार र बेञ्च मिलेर न्यायपालिकाको सुधारका लागि काम गर्नुपर्ने बताएका हुन् ।

‘बार र न्यायपालिका सदा स्वतन्त्र, सक्षम र निष्पक्षताका लागि मिलेर काम गर्नुपर्छ,’ कामु प्रधानन्यायाधीश कार्कीले भने, ‘निरंकुशतामा न्यायापालिका स्वतन्त्र हुन सक्दैन ।’

कार्कीले कानुन व्यवसायीले पक्षको मात्रै न्याय गर्न नहुने र विपक्षीलाई पनि न्याय हुनुपर्ने र राज्यका हरेक क्षेत्र सच्चिनुपर्नेमा जोड दिए ।

कामु प्रधानन्यायाधीश कार्कीले कानुनको मूल्य र मान्यताका आधारमा कार्यपालिका र व्यवस्थापिकाको विवादका साथै प्रदेशका विवाद निरुपण गर्ने निकाय नै सर्वोच्च अदालत हो । उनले आफूले कानुन व्यवसाय र न्याय क्षेत्रको यात्रा दोलखाबाटै प्रारम्भ गरेको स्मरण गरे ।