‘देश निर्माणमा भन्दा पनि नेताहरूको ध्यान पद र कुर्सीतिर छ’ : झलनाथ खनाल

काठमाडौं । नेकपा एकीकृत समाजवादी पार्टीका सम्मानित नेता झलनाथ खनालले नेतृत्वमा भएको कुर्सीप्रतिको मोहका कारण मुलुकको राजनीतिक र आर्थिक संकटमा परेको बताएका हुन् । शुक्रबार नेपाल नर्सिङ कन्फरेन्समा सम्बोधनमा नेता खनालले नेताहरूको ध्यान देश निर्माणभन्दा पनि पद कुर्सीतिर गएको कारण राजनीतिक र आर्थिक संकट भएको बताएका हुन् ।

उनले भने, ‘देशको निर्माण जुन हिसाबले जानुपर्ने थियो । संविधानको भाग ४ मा व्यवस्था भएबमोजिम देश गएन । अहिले पनि गइरहेको छैन । नेताहरूमा पद कुर्सी कता पाइन्छ त्यतातिर ध्यान छ। कुर्सी र पदका पछि लाग्ने नेतृत्वले देशलाई नयाँ भिजन, नयाँ कार्यक्रम, नयाँ योजना, रूपान्तर दिन सक्दैन। अहिले देश संकटतर्फ गुज्रिरहेको छ। राजनीतिक अस्थिरता र आर्थिक अवस्था त्यस्तै संकटपूर्ण हुँदैछ ।’

नेकपा एमालेका अध्यक्ष केपी शर्मा ओलीले गरेको संसद् विघटनतर्फ लक्षित गर्दै नेता खनालले जनताले पाँच वर्ष सरकार चलाउन मत दिए पनि नेतृत्वले देशलाई स्थिरता चाहिएन भनेर संसद् विघटन गरेको बताएका छन् ।