‘सरकारले विद्युत भारत निर्यात गर्ने संयन्त्र बनाउनेछ’ : अर्थमन्त्री महत

काठमाडौं । अर्थमन्त्री डा. प्रकाशशरण महतले ऊर्जाको सम्भावना देखेर नै निजी क्षेत्रका लगानीकर्ता हाइड्रोमा आकर्षित भएको बताएका छन् । बुधबार ऊर्जा सम्मेलनको समापन समारोह सम्बोधनमा ऊर्जामा लगानीकर्तालाई आकर्षितसमेत गरेको भन्दै यस्तो बताएका हुन् ।

उनले भने, ‘ऊर्जाको सम्भावना देखेर नै निजी क्षेत्रका लगानीकर्ता हाइड्रोमा आकर्षित भएका हुन् । यो हाम्रा लागि खुशीको खबर हो । सरकारले लगानीको प्राथमिकतामा ऊर्जालाई लिएको हुनाले यसमा आएका समस्या समाधान गर्न सरकार तयार छ । लगानीकर्तालाई इन्सेन्टिभ दिन तयार छौं । सरकारले विद्युत भारत निर्यात गर्ने संयन्त्र बनाउनेछ । विद्युतका लागि बंगलादेश अर्को ठूलो बजार हो । बंगलादेशसँग विद्युत व्यापार सम्झौतापछि त्यसतर्फ निर्यात गर्न सकिनेछ । विश्व बैंक जस्ता ठूला लगानीकर्ताहरु समेत नेपालका ऊर्जा क्षेत्रमा लगानी गर्न इच्छुक छन् ।’

निजी क्षेत्रले पछिल्लो समय गरेको लगानीले ऊर्जामा राम्रो भएको बताउँदै उनले ऊर्जा नेपालको गतिलो आम्दानीको स्रोत भएको औंल्याए । विद्युत उत्पादनमा लगानी गर्न इच्छुक अन्य धेरै कम्पनीहरु पाइपलाइनमा रहेको उनले जानकारी दिए । यातायातको क्षेत्रलाई विद्युतीकरण गर्नुपर्ने औंल्याउँदै उनले घरायसी प्रयोजनलगायत अन्य क्षेत्रबाट विद्युत खपत बढाउन सकिने बताए ।