विश्वको प्रदूषित सहरहरुको सूचीमा चौथो स्थानमा काठमाडौं, मास्कको अनिवार्य प्रयोग गर्न जनस्वास्थ्यविद्हरुको आग्रह

काठमाडौं । काठमाडौं विश्वकै प्रदूषित सहरहरुको सूचीको चौथो स्थानमा परेको छ । हावाको प्रदुषण मापन गर्ने एयर भिजुअल सूचक आइक्यू एयरको अनुसार पछिल्लो एक सातायता नेपालको वायु अस्वस्थकर बन्दै गएको काठमाडौं विश्वकै प्रदूषित सहरहरुको सूचीको चौथो स्थानमा परेको हो ।

एअर क्वालिटी इन्डेक्स १५० भन्दा माथि भएमा अस्वस्थकर मानिन्छ । एक्युआई ३०० भन्दा बढी हुनु निकै घातक भएको बुझिन्छ र यो अवस्थामा विपद घोषणा गरिनुपर्छ । अहिले काठमाडौंको एक्यूआइ १८५ रहेको छ । आइतबार सूचीको पहिलो स्थानमा एक्यूआइ २३० सहित थाइल्याण्डको च्याङमाइ सहर रहेको छ । यस्तै दोस्रो स्थानमा बंगलादेशको ढाका सहर छ । तेस्रो स्थानमा भारतको दिल्ली, चौथोमा काठमाडौं र पाँचौ नम्बरमा थाइल्याण्डको बैंकक रहेको छ ।

मौसम पूर्वानुमान महाशाखाले देशभर डढेलोको कारण वायु प्रदुषण बढेको बताएको छ । यो मौसमले श्वासप्रश्वास प्रणालीमा गम्भीर असर पार्ने भएकाले मर्निङ वाक नगर्न र मास्कको अनिवार्य प्रयोग गर्न जनस्वास्थ्यविद्हरुले आग्रह गरेका छन् ।