आयोगले दियो ६ वटा संस्थालाई उपनिर्वाचनको पर्यवेक्षण गर्न अनुमति

काठमाडौं । निर्वाचन आयोगले विभिन्न ६ वटा संस्थालाई उपनिर्वाचनको पर्यवेक्षण गर्न अनुमति प्रदान गरेको छ । राष्ट्रिय निर्वाचन पर्यवेक्षण समिति नियोक, अनौपचारिक क्षेत्र सेवा केन्द्र इन्सेक, सुशासन महासंघ नेपाल, विश्व उपभोक्ता महासंघ, नेपाल, पूर्व न्यायाधीश फोरम, नेपाल र राष्ट्र निर्माण मञ्च नेपालले निर्वाचन पर्यवेक्षण गर्न अनुमति प्राप्त गरेका हुन् ।

निर्वाचन पर्यवेक्षण निर्देशिका, २०७९ को दफा ८ उपदफा २ बमोजिम जाँचबुझ गर्दा ६ वटा संस्थाहरुले आवश्यक प्रक्रिया पूरा गरेको पाइएकोले सोही निर्देशिकाको दफा १० को उपदफा १ बमोजिम पर्यवेक्षण गर्न अनुमति दिने निर्णय भएको आयोगका प्रवक्ता शालिग्राम शर्मा पौडेलले जानकारी दिए । उनकाअनुसार आयोगमा ७ वटा निवेदन आएपछि एउटाको हकमा प्रक्रिया पुरा नगरेकाले अनुमति दिइएको छैन ।

आगामी वैशाख १० गते आइतबार बारा २, तनहुँ १ र चितवन २ मा प्रतिनिधिसभा सदस्यको उपनिर्वाचन हुँदैछ ।