‘कर्णालीमा माओवादी नेतृत्वकै सरकार हुन्छ, केन्द्रले छिट्टै निर्णय गर्नेछ’ : जनार्दन शर्मा

सुर्खेत । नेकपा माओवादी केन्द्रका उपमहासचिव एवं पूर्व अर्थमन्त्री जनार्दन शर्माले कर्णाली प्रदेश सरकारमा कांग्रेससँग नै सहकार्य हुने बताएका छन् । शुक्रबार बिहान सुर्खेत विमानस्थलमा पत्रकारसँग कुरा गर्दै अर्थमन्त्री शर्माले प्रदेशमा देखिएका उल्झन केन्द्रीय गठबन्धनले सुल्झाउने र कर्णाली प्रदेश सरकारमा कांग्रेससँग नै सहकार्य हुने बताएका हुन् ।

उनले भने, ‘केन्द्रको गठबन्धन अनुसार नै कर्णाली सरकारलाई नयाँ दिशा दिनुपर्ने आवश्यकता छ । मैले आज बिहान मात्रै जीवनबहादुर शाही जीसँग पनि मिटिङ गरेँ । प्रारम्भिक छलफलमा छिट्टै नयाँ स्वरूप दिने गरी सहमति भएको छ । यो अलमल छिट्टै अन्त्य गरेर सरकारलाई अगाडि बढाउँछौं । कर्णालीको सन्दर्भमा हाम्रै सरकार हुन्छ । गठबन्धनका अन्य दलहरू सरकारमा सहभागी हुन्छन् । यसको निर्णय केन्द्रीय गठबन्धनले नै गर्छ ।’

चुनावताका प्रचण्डले मुख्यमन्त्रीका लागि कांग्रेसलाई वचन दिएको सन्दर्भमा पत्रकारको प्रश्नमा शर्माले कर्णालीमा माओवादी नेतृत्वकै सरकार हुने बताए । नेता शर्माले माओवादीकै एजेण्डामा देश अघि बढे पनि पार्टी कमजोर हुनुलाई गम्भीरतापूर्वक लिनुपर्ने बताए ।