‘जनताको सुख दुःख बुझेर  सेवा गर्ने उच्चतम अठोट लिनुपर्छ’ : राष्ट्रपति पौडेल

काठमाडौं । राष्ट्रपति रामचन्द्र पौडेलले जनताको   सुख दुःख बुझेर  सेवा गर्ने उच्चतम अठोट, प्रतिबद्धता र समर्पणबाट अभिप्रेरित हुनुपर्ने बताएका छन् । सोमबार काठमाडौंमा दिवंगत पूर्व मन्त्री नवीन्द्रराज जोशीको सालिक अनावरण गर्दै उनले ‘राजनीति समाज र जनताप्रतिको सेवा भावले ओतप्रोत  हुनुपर्ने बताएका हुन् । 

उनले भने जनतासँगको निरन्तर सान्निध्य तासँगै उनीहरुको सुख दुःख बुझेर उनीहरुकै लागि सेवा गर्ने उच्चतम अठोट, प्रतिबद्धता र समर्पणबाट अभिप्रेरित हुनुपर्छ । राजनीति समाज र जनताप्रतिको सेवा भावले ओतप्रोत हुनुपर्छ ।  जनतासँग निकटतम सम्बन्ध राख्ने र उनीहरुका सुख दुःख बुझ्ने नवीन्द्र यही दर्शनबाट प्रभावित थिए ।’ 

राष्ट्रपति पौडेलले मुलुक र समाज परिवर्तनका लागि सदैव दृढ संकल्पित, सिद्धान्तनिष्ठ कार्यकर्ताका रुपमा जोशीले लोकतन्त्रलाई जीवनपद्धतिका रुपमा आत्मसाथ गरी लोकतन्त्रको संस्थागत विकासमा पुर्‍याएको योगदान भावी पुस्ताका लागि सदैव प्रेरणाको स्रोत बन्ने बताए ।