इक्वेडरमा ६.७ म्याग्निच्युडको भूकम्प, कम्तिमा १३ जनाको मृत्यु

काठमाडौं । दक्षिण अमेरिकी देश इक्वेडरको दक्षिणी तटमा शक्तिशाली भूकम्प गएको छ । शनिबार दक्षिणी सहर बालाओ नजिक केन्द्रबिन्दु बनाएर ६.७ म्याग्निच्युडको भूकम्प गएको हो ।

भूकम्प जाँदा कम्तिमा १३ जनाको मृत्यु भएको बीबीसीले जनाएको छ । युएसजीएसका अनुसार इक्वेडरका आधाभन्दा बढी प्रान्तमा शक्तिशाली भूकम्पको धक्का महसुस गरिएको थियो । भूकम्पका कारण देशका धेरै सहरमा भवनमा पनि क्षति पुगेको छ । भूकम्पबाट सबैभन्दा बढी प्रभावित एल ओरु प्रान्तमा ११ जनाको मृत्यु भएको विवरण प्राप्त भएको सरकारी अधिकारीहरुले जनाएका छन् ।

अजुए प्रान्तमा एक जनाको मृत्यु भएको छ । उत्तरी पेरुमा पनि भूकम्पको धक्का महसुस गरिएको थियो । यहाँ टुम्बेस प्रान्तमा घर भत्किँदा एक महिलाको मृत्यु भएको छ । इक्वेडरको आपतकालीन सेवाले यहाँका घरहरु भत्किँदा धेरै मानिसहरु भग्नावशेषमुनि पुरिएका र उनीहरुलाई उद्दार गर्ने काम तीव्र गतिमा भइरहेको बताएको छ ।