प्रधानमन्त्री प्रचण्ड र देउवाले गरे उपराष्ट्रपतिका लागि मतदान

काठमाडौं । प्रधानमन्त्री पुष्पकमल दाहाल प्रचण्ड र नेपाली कांग्रेसका सभापति शेरबहादुर देउवाले उपराष्ट्रपति पदका लागि संघीय संसदमा जारी निर्वाचनमा मतदान गरेका छन् । संघीय संसद भवनको ल्होत्से हलमा जारी निर्वाचनका क्रममा दुवैजनाले केही बेर अघि मतदान गरेका हुन् ।

उपराष्ट्रपतिका लागि प्रचण्ड र देउवाले रामसहाय प्रसाद यादवलाई समर्थन गरेका छन् । जारी मतदानमा दिउँसो १२ बजेसम्मको मतदानमा प्रदेशतर्फ ३८३ र संघतर्फ २१२ मत खसेको छ । निर्वाचनमा संघीय संसद्का ३३२ र प्रदेशसभाका ५५० सांसद मतदाता छन् । मतदान सम्पन्न भएलगत्तै मतगणना सुरु हुने र आजै साँझ ६ बजेसम्म मतपरिणाम सार्वजनिक गरिने उपराष्ट्रपति निर्वाचन अधिकृतको कार्यालयले जनाएको छ ।

उपराष्ट्रपति पदमा एमालेबाट अष्टलक्ष्मी शाक्य, जसपाका रामसहाय यादव र जनमतकी ममता झा उम्मेदवार छन् । यादवलाई सत्ता गठबन्धन दल कांग्रेस, माओवादी, नेकपा एसलगायत दलको समर्थन छ ।