राष्ट्रपति निर्वाचनका सन्दर्भमा मतदातालाई प्रशिक्षण दिने गठबन्धनको निर्णय

काठमाडौं । सत्ता गठबन्धनका दलहरूले राष्ट्रपति निर्वाचनका सन्दर्भमा आफ्ना मतदातालाई प्रशिक्षण दिने निर्णय गरेका छन् । सिंहदरबारमा मंगलबार बसेको सत्ता गठबन्धनको राष्ट्रपति निर्वाचन परिचालन समितिको बैठकले यस पटक यसअघि भन्दा फरक ढङ्गले राष्ट्रपतिको निर्वाचन हुन लागेकाले आवश्यक प्रशिक्षण दिने निर्णय गरेको हो ।

प्रशिक्षणका लागि मतदानमा सहभागी हुने सदस्यहरूलाई बुधबार ११ बजेसम्म काठमाडौं आइपुग्न निर्देशन दिएको छ । बैठकपछि काँग्रेस उपसभापति पूर्णबहादुर खड्काले सत्ता गठबन्धनका उम्मेदवार रामचन्द्र पौडेलको पक्षमा मतदानका लागि प्राविधिक तयारी गरिएको जानकारी दिए ।

उनले देशभरबाट आएका मतदाताहरूलाई अभिमुखीकरण गर्ने कार्यक्रम तय भए पनि निर्वाचन आचारसंहिता लागू भएकाले सो कार्यक्रम स्थगित भएको जानकारी दिए । त्यस्तै जसपाका नेता राजेन्द्र श्रेष्ठले निर्वाचनका सम्बन्धमा गर्नुपर्ने सबै कामलाई व्यवस्थित गर्न सम्बन्धित दलले तयारी गर्ने निर्णय भएको बताए ।