‘विश्वासको मत लिएकै दिन म ओलीबाट झस्किएको थिए’ : प्रधानमन्त्री दाहाल

काठमाडौं । प्रधानमन्त्री पुष्पकमल दाहाल ‘प्रचण्ड’ले नेकपा एमालेका अध्यक्ष केपी शर्मा ओलीले संसद् विघटनका विषयमा राखेको मत र अडान आफू झस्किएको बताएका छन् । राष्ट्रपतिमा रामचन्द्र पौडेललाई समर्थन गर्ने ८ दलका सांसदलाई प्रशिक्षण कार्यक्रमलाई सम्बोधन गर्दै प्रधानमन्त्री दाहालले हिजोको तिक्ततालाई फेरि उठान गर्दै आफ्ना गलत कदमलाई ठिक सावित गर्ने प्रयास गरेपछि आफू झस्किएको बताएका हुन् ।

नेकपा माओवादी केन्द्रका अध्यक्षसमेत रहेका प्रचण्डको भनाई उदृत गर्दै एक सांसदले भने, ‘मलाई प्रधानमन्त्री केपीजीले नै बनाउनुभएको हो । तर, विश्वासको मत लिएकै दिन उहाँका अभिव्यक्तिले मन चसक्क बनाएको थियो । हिजो संसद् विघटनविरुद्ध लडेको मेरा लागि आज संसद् विघटन ठिक थियो भन्दै बस्न सक्ने अवस्था थिएन त्यसैले मैले पुरानो गठबन्धनलाई निरन्तरता दिँदै संविधान र लोकतन्त्रका लागि काम गर्नुपर्छ भन्ने निष्कर्ष निकाले । त्यसैले पनि पुरानो गठबन्धन ब्यूँताउनुपर्छ भन्ने मलाई कहाँकहाँ लागेको थियो । अहिलेका राष्ट्रपतिबाट तितो अनुभव छ । रामचन्द्रजी संसद् विघटनविरुद्ध लडेको व्यक्ति हो । राष्ट्रपतिको संस्थाको गरिमा बढाउन उहाँले योगदान गर्न सक्नुहुन्छ । संविधानको भावना र राष्ट्रपति पदको मर्यादा रामचन्द्रजीले बुझ्नुहुनेछ भन्ने मेरो विश्वास छ ।’

उनले ओलीसँग अन्तिम दिन पनि रामचन्द्र पौडेललाई प्रस्ताव गरेर सहमतिको राजनीति सुरुवात गरौ भन्दा पनि तयार नभएको बताएका थिए । उनले राष्ट्रपतिमा रामचन्द्र पौडेल नै उपयुक्त उम्मेदवार भएको जिकिर गरे ।