लिग टु खेल्न क्यानका कोषाध्यक्षसँग यूएई गए सन्दीप, भोलिको म्याच खेल्न सक्ने सम्भावना

काठमाडौं । सन्दीप लामिछाने बुधबार आज यूएई प्रस्थान गरेका छन् । अदालतले विदेश भ्रमण फुकुवा गरेपछि विश्वकप लिग २ अन्तरगत यूएईमा जारी त्रिकोणात्मक श्रृंखलामा सहभागी हुन सन्दीप यूएई प्रस्थान गरेका हुन् ।

नेपाल क्रिकेट संघ क्यानका कोषाध्यक्ष रोशनकुमार सिंहका साथमा ३ बजेको उडानबाट उनी प्रस्थान गएका हुन् । नेपालले भोलि आफ्नो दोस्रो म्याच आयोजक यूएईसँग खेल्दैछ । सो म्याचमा सन्दीप सहभागी हुन सक्ने भएका छन् । टीममा रहेका अर्का स्पिनर मौसम ढकाल घाइते भएपछि क्यानले उनको स्थानमा सन्दीपलाई प्रतिस्थापन गरेको हो ।

विदेश यात्रामा प्रतिबन्धका कारण त्रिकोणात्मक श्रृंखलामा सन्दीप नेपाली राष्ट्रिय टिमसँग जान पाएका थिएनन् । सर्वोच्चले आइतबार उनको प्रतिबन्ध फुकुवा गरेपछि यूएई जाने बाटो खुलेको हो । नेपाल क्रिकेट संघ क्यानले उनलाई नेपाली राष्ट्रिय टिममा थप गर्नका लागि यूएई पठाएको हो ।