पाँच दिनसम्म देशभर भारी वर्षा हुने

काठमाडौं/ ८ माघ, भोली सोमबारदेखि पाँच दिन देशभरि भारी वर्षाको सम्भावना रहेको जल तथा मौसम विज्ञान विभागले जनाएको छ । मनसुन सुरु भएयता परेको पानीले पहाड र चुरे क्षेत्रका भू–भागमा भूस्खलन र पहिरो ल्याएको र अब पाँच दिन पर्ने पानीले पहिरोको सम्भावना अझ बढाउनेप्रति विभागले सतर्क गराएको छ ।

प्रदेश नं. १, मधेश, बागमती , गण्डकी र लुम्बिनी प्रदेशका केही स्थानमा भारी वर्षाको सम्भावना रहेको विभागका महानिर्देशक सुरजकुमार वैद्यले बताए । साथै कर्णाली प्रदेश र सुदूरपश्चिम प्रदेशका थोरै स्थानमा भारी वर्षा हुने सम्भावना रहेको उनको भनाइ छ ।

मनसुन सुरु हुनुभन्दा पहिलेदेखि नै औसतभन्दा बढी वर्षा भइरहेको उनले बताए । मनसुन सुरु भएयता देशका विभिन्न स्थानमा बाढी र पहिरोले ठूलो क्षति पुर्याएको छ ।

गृह मन्त्रालयमा भएको कार्यक्रममा भू–गर्भविद् शिव बाँस्कोटाले जमिन चिरा परेको र रूखहरू ढल्किएको ठाउँमा पहिरोको जोखिम हुने भएकाले सतर्कता अपनाउन आग्रह गरे ।

पानीका मुहानहरू सुक्ने वा पहिलेभन्दा बढी र धमिलो पानी आउने ठाउँमा पनि पहिरोको जोखिम रहेकोले यस्तो अवस्थामा सतर्कता अपनाउन उनले आग्रह गरे ।

राष्ट्रिय विपत् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलले विपत् व्यवस्थापनमा संलग्न सुरक्षा निकायलाई उद्धार तथा राहतका लागि तयारी अवस्थामा राखेको बताए । सरकारी र गैरसरकारी निकाय पनि तयारी अवस्थामा रही तत्काल परिचालन हुने अवस्थामा रहेको उनको भनाइ छ ।