प्रचण्ड नेतृत्वमा मन्त्रीपरिषद विस्तार, चार उपप्रधानमन्त्री, १५ मन्त्री र ३ राज्यमन्त्री

काठमाडौ/ ३ माघ, प्रधानमन्त्री पुष्पकमल दाहाल (प्रचण्ड)को नेतृत्वमा आज (मङ्गलबार) मन्त्रीपरिषद् विस्तार भएको छ । प्रधानमन्त्री प्रचण्डले चार उपप्रधानमन्त्री, १५ मन्त्री र ३ राज्यमन्त्री सहित २३ सदस्यीय मन्त्रीपरिषद गठन गरेका हुन् । नवनियुक्त मन्त्रीहरूले आजै पद तथा गोपनीयताको शपथ लिएका छन् ।

राष्ट्रपति भवनमा नवनियुक्त मन्त्रीहरूलाई राष्ट्रपति विद्यादेवी भण्डारीले पद तथा गोपनीयताको शपथ गराएकी हुन् । सत्ता साझेदार दल राप्रपाका अध्यक्ष राजेन्द्र लिङ्देन आज उपप्रधानमन्त्री नियुक्त भएका छन् । उनले ऊर्जा तथा जलस्रोत मन्त्रालयको जिम्मेवारी सम्हालेका छन् । यस अघि पौष ११ गते नेकपा एमालेकातर्फबाट विष्णु पौडेल, नेकपा माओवादीका तर्फबाट नारायणकाजी श्रेष्ठ र राष्ट्रिय स्वतन्त्र पार्टीका तर्फबाट रवि लामिछाने उपप्रधानमन्त्रीमा नियुक्त भएका थिए ।

यसैगरी, सञ्चार तथा सूचना प्रविधि मन्त्रीमा माओवादी नेत्री रेखा शर्मा नियुक्त भएकी छिन् । नेकपा (माओवादी केन्द्र) का अमनलाल मोदी सङ्घीय मामिला तथा सामान्य प्रशासनमन्त्री बनेका छन् भने सुदन किराँती पर्यटन तथा नागरिक उड्ययनमन्त्री तथा सुशिला सिर्पाली ठकुरी भौतिक पूर्वाधार राज्यमन्त्री भएका छन् ।

यसैगरी, नेकपा (एमाले) बाट डा. विमला राई पौडेल, पदम गिरी, भगवती चौधरी र हरि उप्रेती मन्त्री नियुक्त भएका छन्। पौडेलले परराष्ट्र र गिरीले स्वास्थ्य मन्त्रालयको जिम्मेवारी पाएका छन् । त्यस्तै, राष्ट्रिय प्रजातन्त्र पार्टी (राप्रपा) बाट सहरी विकास मन्त्रीमा उपाध्यक्ष विक्रम पाण्डे र कानुन मन्त्रीमा ध्रुवबहादुर प्रधानले जिम्मेवारी पाए भने राप्रपाबाटै दीपक सिंह ऊर्जा राज्यमन्त्री भएका छन् ।

राष्ट्रिय स्वतन्त्र पार्टी (रास्वपा) बाट डोलप्रसाद अर्याललाई श्रम र शिशिर खनाललाई शिक्षामन्त्रीको जिम्मेवारी दिइएको छ । यसैगरी, रास्वपाकी तोसिमा कार्की स्वास्थ्य तथा जनसङ्ख्या राज्यमन्त्री भएकी छिन् ।

यसैगरी, यस अघि गत पुस १० गते प्रधानमन्त्रीमा नियुक्त भएका दाहालले पुस ११ गते पद तथा गोपनीयताको शपथ लिएका थिए । सोही दिन उपप्रधानमन्त्री एवम् अर्थमन्त्रीमा विष्णु पौडेल, उपप्रधानमन्त्री एवम् भौतिक पूर्वाधार तथा यातायातमन्त्रीमा नारायणकाजी श्रेष्ठ र उपप्रधानमन्त्री एवम् गृहमन्त्रीमा रवि लामिछानेले पद तथा गोपनीयताको शपथ लिएका थिए। एमालेका चार र जनमत पार्टीका अब्दुल खानले पनि सोही दिन मन्त्री पदको शपथ लिएका थिए ।