नेपाली कांग्रेस बागमती प्रदेशको उपनेतामा चित्रकार, मुख्य सचेतकमा काफ्ले

काठमाडौ/ २ माघ, नेपाली कांग्रेस बागमती प्रदेशसभा संसदीय दलको उपनेतामा रामकृष्ण चित्रकार र मुख्य सचेतकमा कुन्दनराज काफ्ले नियुक्त भएका छन् ।
नेपाली कांग्रेस बागमती प्रदेश संसदीय दलको सोमबार बसेको बैठकले चित्रकारलाई उपनेता र काफ्लेलाई मुख्य सचेतकमा नियुक्त गरेको हो ।

कांग्रेस बागमती प्रदेश संसदीय दलका नेता बहादुरसिंह लामाको अध्यक्षतामा बसेको बैठकले प्रदेश सांसद चित्रकार र काफ्लेलाई मनोनीत गरेको हो ।

चित्रकार ललितपुर क्षेत्र नं. २ को ख प्रदेश निर्वाचन क्षेत्रबाट निर्वाचित सांसद हुन् भने काफ्ले प्रदेशसभामा दोलाखा प्रदेश निर्वाचन क्षेत्र नं क बाट निर्वाचित सांसद हुन् ।
२०६४ मा संविधानसभा सदस्यमा निर्वाचित भएका चित्रकार नेपाली काँग्रेसका महासमिति सदस्य तथा नेविसंघका पूर्वउपाध्यक्ष समेत हुन् । नेविसंघका पूर्वमहामन्त्री काफ्ले कांग्रेसको १४ औं महाधिवेशनबाट निर्वाचित केन्द्रीय सदस्यसमेत हुन्।

बैठकले पोखरामा भएको यति एरलाइसन्सको विमान दुर्घटनामा मृत्यु भएको परिवारप्रति समवेदना व्यक्त गर्दै शोक प्रस्ताव समेत पारित गरेको छ ।